Ffilm Cymru a Chymru Greadigol Cronfa Cynhyrchu Ffilmiau Nodwedd Annibynnol 2022 Cwestiynau Cyffredin

Bydd y trefniant unigryw hwn yn creu model ariannu symlach a mwy buddiol i gynhyrchwyr, lle mae un broses ymgeisio yn rhoi mynediad i arian Llywodraeth Cymru ac arian y Loteri Genedlaethol a ddirprwywyd i Gyngor Celfyddydau Cymru, a hynny wedi’i reoli gan Ffilm Cymru Wales.

Mae Cymru Greadigol wedi bod yn buddsoddi’n uniongyrchol mewn cynyrchiadau ers ei sefydlu ym mis Ionawr 2020. Maent wedi buddsoddi mewn 18 o gynyrchiadau a sbarduno gwariant o tua £131m yn yr economi leol. Mae Cymru Greadigol hefyd yn cynnig cyllid ar gyfer gemau, elfennau rhyngweithiol, a rhaglenni teledu wedi’i sgriptio a heb ei sgriptio.

Profiad Helaeth

Fel asiantaeth ddatblygu’r sector ffilmiau yng Nghymru, bu Ffilm Cymru yn gweithio’n uniongyrchol gydag awduron, cyfarwyddwyr, cynhyrchwyr a thalent a chwmnïau cysylltiedig am dros 16 mlynedd. Maent wedi cynorthwyo dros 80 o ffilmiau nodwedd gweithredu byw, animeiddiedig a dogfen hyd at eu cynhyrchu, gan gynnwys sawl un a ariannwyd ar y cyd â Llywodraeth Cymru. Mae Ffilm Cymru bob amser wedi blaenoriaethu prosiectau sydd â thalent o Gymru – awduron, cyfarwyddwyr a chynhyrchwyr – yn Gymraeg a Saesneg. Mae’r ffilmiau’n cynnwys Gwledd / The Feast gan Lee Haven Jones, Censor gan Prano Bailey-Bond, Save the Cinema gan Sara Sugarman, I Am Not a Witch gan Rungano Nyoni, ffilm ddogfen Hijra sydd ar y gweill gan Ila Mehrotra a’r ffilm nodwedd animeiddiedig Kensuke’s Kingdom sydd ar y gweill.

Cydweithio

Bu Cymru Greadigol a Ffilm Cymru yn cydweithio o’r cychwyn cyntaf, gan gynnwys cydariannu ffilmiau nodwedd fel Dream Horse gan Euros Lyn, Six Minutes to Midnight gan Andy Goddard a The Almond and the Seahorse sydd ar y gweill gan Mad as Birds Films, sydd â Rebel Wilson (Pitch Perfect, Bridesmaids) yn serennu ynddi ac sy’n cael ei chydgyfarwyddo gan Celyn Jones. 

Llif o dalent

Mae Ffilm Cymru yn cefnogi talent sy’n dod i’r amlwg o gam cynnar drwy gyllid ar gyfer ffilmiau byr, hyfforddiant wedi’i deilwra a rhwydweithio rhwng cymheiriaid gyda chyllid gan y BFI a Chyngor Celfyddydau Cymru. Mae ganddynt lechen o ryw 30 o brosiectau sydd ar y gweill ar gyfer eu cynhyrchu. Nid oes yn rhaid i brosiectau sy’n gwneud cais am gyllid cynhyrchu fod wedi derbyn cyllid datblygu blaenorol gan Ffilm Cymru. 

Talent o Gymru

Bydd y trefniant ariannu newydd rhwng Cymru Greadigol a Ffilm Cymru yn canolbwyntio ar ffilmiau nodwedd sy’n cael eu harwain gan awduron, cyfarwyddwyr a/neu gynhyrchwyr sy’n enedigol o Gymru neu sy’n seiliedig yma.  

Manteision Economaidd

Bydd o leiaf £12miliwn yn cael ei gynhyrchu mewn gwariant uniongyrchol yng Nghymru ar draws dwy flynedd o gyllid, ac mae’n ofynnol i o leiaf £6 gael ei wario yn yr economi leol am bob £1 sy’n cael ei ddarparu gan Lywodraeth Cymru. Bydd hyn yn hybu’r gymuned o weithwyr creadigol, cast, criw, gwasanaethau a chyfleusterau o safon fyd-eang sydd yng Nghymru.  

Manteision Diwylliannol

Bydd y cyllid hwn yn rhoi hwb go iawn i’r ffilmiau hynny o Gymru nad ydynt bob amser yn gallu denu mwy o gyllid masnachol, gan dalent sy’n aml ar gam cynharach yn eu gyrfaoedd. Mae cefnogaeth i ffilmiau annibynnol yn rhan hanfodol o ecosystem byd ffilmiau; mae’r ffilmiau hyn yn aml yn herio confensiynau’r diwydiant ffilmiau prif ffrwd, maent yn cymryd risgiau ac yn gwthio ffurf gelfyddydol ffilmiau. Maent yn lansio gyrfaoedd ac yn fwy tebygol o gynrychioli profiadau bywyd go iawn y mae ffilmiau nodwedd yn hanesyddol wedi’u hanwybyddu.

Twf y sector a hyfforddiant

Bydd gofyn i bob ffilm a gefnogir gynnig cyfleoedd i hyfforddeion o Gymru mewn rolau o flaenoriaeth. Mae yna dwf cryf yn y sector ac mae galw ar draws pob adran. Amcan Ffilm Cymru a Chymru Greadigol fydd hwyluso ystod o gyfleoedd i hyfforddeion a chyfleoedd cysgodi ar draws nifer o ddisgyblaethau a lefelau gan gynnwys prentisiaethau. Bydd Ffilm Cymru’n cefnogi cynhyrchwyr sy’n cyflwyno hyfforddeion o ddarparwyr hyfforddiant eraill yng Nghymru ac o’i raglenni hyfforddiant ei hun gan gynnwys Troed yn y Drws, a’r cynhyrchydd fydd yn gyfrifol am yr penodiadau terfynol.

Meini prawf ariannu

Bydd y gronfa newydd yn ddetholus, ac yn defnyddio meini prawf asesu tryloyw sy’n edrych ar rinweddau creadigol y prosiect, y manteision i dalent o Gymru, ei hyfywedd, a’i allu i hybu’r sector ffilmiau i’r dyfodol, boed mewn perthynas ag amrywiaeth a chynhwysiant, cynaliadwyedd amgylcheddol neu ddatblygu talent. 

Manteision i gynhyrchwyr

Mae Ffilm Cymru wedi cyfuno arian y Loteri Genedlaethol a ddirprwywyd iddynt gan Gyngor Celfyddydau Cymru a chronfa cynhyrchu annibynnol Cymru Greadigol i greu un gronfa ar gyfer cynhyrchu ffilmiau. Mae hyn yn golygu y gall cynhyrchwyr bellach gael mynediad i’r ddwy gronfa drwy un cais i Ffilm Cymru, gan gynnig cyfuniad o ecwiti (arian Loteri Genedlaethol Cyngor Celfyddydau Cymru) a buddsoddiad grant (cyllid Cymru Greadigol). Mae modd gwneud cais am fwyafswm o £600,000 fesul cynhyrchiad, yn amodol ar wariant yng Nghymru a buddion o ran datblygu’r sector. Bydd yr holl gyllid yn cael ei gyflwyno ar sail llif arian drwy gydol y cynhyrchiad. Bydd cyllid Cymru Greadigol yn parhau i fod yn anad-daladwy, ond bydd angen ad-dalu unrhyw ddiffyg mewn gwariant yng Nghymru. 

Creu ffilmiau yn y dyfodol

Bydd Ffilm Cymru yn parhau i gefnogi cynhyrchwyr annibynnol drwy ddarparu’r cyngor a’r adnoddau sydd eu hangen arnynt i fod yn rhan o sector ffilmiau cynaliadwy yng Nghymru. Bydd yn cefnogi cynhyrchwyr ar sail pedwar conglfaen: cynaliadwyedd, gan gynnwys rheoli effaith amgylcheddol cynyrchiadau, sut i weithio’n fwy cynhwysol, arloesi o ran model busnes, ac adeiladu’r gallu i dyfu drwy hyfforddi criw newydd a darparu cyfleoedd datblygiad proffesiynol.

Codi pontydd byd-eang

Mae chwarter y ffilmiau a ariannwyd gan Ffilm Cymru wedi bod yn gyd-gynyrchiadau rhyngwladol, gan godi pontydd diwylliannol ac economaidd â gwledydd ledled y byd. Mae’r ffilmiau a gefnogwyd wedi’u gwerthu i dros 40 o diriogaethau, wedi’u dangos am y tro cyntaf mewn gwyliau rhyngwladol pwysig fel Cannes, Sundance a Toronto, ac wedi cyflwyno talent o Gymru i’r byd.

 

Cwestiynau Cyffredin

Pam nad yw holl gyllid cynhyrchu ffilmiau Llywodraeth Cymru yn cael ei ddatganoli i Ffilm Cymru Wales?
Yn seiliedig ar fuddsoddiadau hanesyddol mewn ffilmiau gan Gymru Greadigol a Ffilm Cymru Wales, credwn y bydd y rhan fwyaf o’r ffilmiau lle mai’r bwriad yw eu rhyddhau mewn theatrau yn cyd-fynd â chylch gwaith y gronfa hon. Bydd Cymru Greadigol yn parhau i reoli buddsoddiadau i gynyrchiadau lle mai’r bwriad yw eu darlledu ar y teledu a/neu drwy ffrydwyr yn unig, yn ogystal â phrif ffilmiau nodwedd sydd ddim yn cyd-fynd â chylch gwaith buddsoddiadau Ffilm Cymru, er enghraifft rhai sydd heb lawer neu ddim talent o Gymru yn eu harwain neu sy’n gofyn am fwy na £600,000 o gyllid o Gymru.

Cynllun peilot yw’r cydweithrediad hwn, a chaiff ei adolygu ar bwyntiau allweddol yn ystod oes y cytundeb i sicrhau ei fod yn ateb y diben i ddiwallu anghenion y sector yng Nghymru.

Pa oruchwyliaeth fydd gan Lywodraeth Cymru dros benderfyniadau ariannu?
Bydd cynrychiolydd o Gymru Creadigol ar banel Ffilm Cymru Wales sy’n trafod ac yn penderfynu ar geisiadau i’r gronfa hon a bydd Ffilm Cymru yn adrodd yn rheolaidd i Gymru Greadigol drwy gydol gweithrediad y gronfa.

Sut y rhoddir cyfrif am y penderfyniadau ariannu a’r dyfarniadau a sut y byddant yn cael eu cyhoeddi? 
Bydd y penderfyniadau ariannu yn cael eu cyhoeddi ar wefan Ffilm Cymru Wales ac yn ei Adroddiadau Blynyddol. 

A fydd y cyllid yn cefnogi ffilmiau nodwedd animeiddiedig a dogfen?
Bydd. Fel yn achos cronfeydd Datblygu a Chynhyrchu blaenorol Loteri Genedlaethol Ffilm Cymru Wales, bydd y gronfa hon ar gael i gefnogi ffilmiau nodwedd gweithredu byw, animeiddiedig a dogfen lle mai’r bwriad yw i’r ffilmiau hynny gael eu rhyddhau mewn sinemâu.

A fydd y cyllid yn cefnogi ffilmiau nodwedd yn y Gymraeg?
Bydd. Fel yn achos cronfeydd Datblygu a Chynhyrchu blaenorol Loteri Genedlaethol Ffilm Cymru Wales, bydd y gronfa hon ar gael i gefnogi ffilmiau nodwedd mewn unrhyw iaith, gan gynnwys y Gymraeg, lle mai’r bwriad yw i’r ffilmiau hynny gael eu rhyddhau mewn sinemâu. Mae Ffilm Cymru yn croesawu ffilmiau sy’n cael eu cydariannu ag S4C ac arianwyr eraill.

Sut y bydd y gronfa hon yn gweithio gyda chronfa newydd Cymru Greadigol / S4C ar gyfer ffilmiau Cymraeg?
Mae’r trefniadau ar gyfer cefnogi Ffilmiau Cymraeg fel a amlinellir yn y Memorandwm Cyd-ddealltwriaeth rhwng Cymru Greadigol ac S4C yn dal i gael eu datblygu a bydd rhagor o fanylion ar gael yn nes ymlaen eleni.